Ir o contido principal

Cinco Anos do Proxecto Manuel Rodríguez López

A finais do ano 2017 o proxecto Manuel Rodríguez López cumpriu cinco anos. Cinco anos de intenso traballo e esforzo por parte de moitas persoas e institucións, unidas en torno á figura de Manolo.

Cinco anos desde que GaliciaDigital puxo en marcha unha campaña de difusión da vida e obra de Manuel Rodríguez López, para dar a coñecer axeitadamente o traballo deste autor, a súa ampla obra literaria, o amor pola súa terra, e o vencello por el establecido entre a súa terra natal de Paradela (e, en xeral, Galicia) cos galegos emigrantes en Cataluña. E desde entón, os principais piares do proxecto seguen en funcionamento e con  mellor saúde que nunca.

Web

A primeira acción da campaña consistiu na creación do portal web www.manuelrodriguezlopez.org, unha das máis completas webs que teña un escritor galego, que recolle a súa obra completa e a información máis salientable da súa existencia, en catro idiomas: castelán, galego, inglés e catalán.

Dentro dos máis de 2 Gb de información que posúe a web compre destacar tamén o especial 25 aniversario do seu pasamento, onde máis de 50 persoeiros da cultura galega, moitos deles amigos de Manolo, falan sobre el e sobre a fonda pegada que deixou.

Cinco anos despois, esta web recibe máis de 4.000 visitas mensuais.  É dicir, máis de 100 persoas cada día entran nesta plataforma para descubrir ou coñecer mellor a Manuel Rodríguez López.


 

Exposición Itinerante

Veu despois a Exposición Itinerante sobre a vida e obra de Manuel Rodríguez, formada por 16 paneis informativos (pode ser vista integramente na web). Esta exposición púxose en marcha en Paradela, en agosto de 2013,  e nos primeiros tempos estivo en Lugo, Santiago de Compostela, A Coruña, Ourense, Ferrol e Pontevedra. Tamén visitou Begonte, Sarria, Portomarín, Vilalba, Ponteceso, Guitiriz e Meira. Fóra de Galicia, chegou ó Centro Galego de Barcelona e á Casa de Galicia en Madrid.

O ano 2016 supuxo un salto cualitativo moi importante para a exposición: non só seguiu percorrendo Galicia (visitando Celanova, Verín e Viveiro), senón que chegou a varios Centros Galegos do noso país (León, Salamanca e Vitoria). Pero o que realmente fixo medrar o impacto e a visibilidade da mostra foi o feito de cruzar as nosas fronteiras, e chegar a Portugal, visitando o Centro Galego de Lisboa e a Biblioteca Lúcio Craveiro da Silva en Braga, da man da Universidade do Minho.

O ano 2017 foi, sen dúbida algunha, o ano da consolidación do proxecto, continuando o seu percorrido por Portugal (Universidade de Faro), Galicia (Burela, Mondoñedo, Ribadeo e Vigo) e o resto de España (Universidades de Cáceres, Granada e Bilbao).

A madurez do proxecto Manuel Rodríguez López queda patente no impacto cada vez maior que ten nos medios de comunicación, tanto en papel como en Internet. Se as primeiras exposicións practicamente non tiveron presenza nos medios máis aló do anuncio nos medios locais, hoxe en día conservamos na web centos de referencias ó proxecto en Internet, xornais, radio e televisión.

E non só iso, o feito de vincular a exposición a entidades relacionadas coa educación, como colexios, institutos e universidades (lectorados de galego en España e Portugal) asegurar a masiva afluencia de estudantes, o que maximiza a difusión do proxecto e da figura de Manuel Rodríguez López.


 

Publicacións

Por outra banda, seguimos adiante coa difusión das reedicións de dúas publicacións de grande importancia no proxecto: a Antoloxía Poética, creada por Xesús Alonso Montero e Santiago Rodríguez, e o folleto que recolle todos os contidos da exposición itinerante.

E finalmente, durante este ano 2017 as obras de Manolo Rodríguez atoparon unha nova canle de difusión, a través da Biblioteca Virtual de GaliciaDigital (www.galiciadigital.com/biblioteca_virtual), que periodicamente vai incorporando novas obras do autor,  e as pon ao dispor, de xeito totalmente gratuíto, das decenas de miles de visitantes que a plataforma recibe cada día.


 

Seguimos Camiñando

Pode parecer que o proxecto xa deu boa parte dos froitos que podía dar, pero en GaliciaDigital estamos convencidos de que temos por diante un longo percorrido, e de que aínda queda o mellor por chegar, e por iso seguimos adiante.

E seguimos adiante da man de todas as entidades que permiten levar a cabo este proxecto: a Familia de Manuel Rodríguez López, o Concello de Paradela (que con este Certame Literario é o verdadeiro motor do proxecto e de todos os que estamos arredor), a Deputación Provincial de Lugo, a Real Academia Galega, e a Xunta de Galicia (Secretaría Xeral de Política Lingüística), e o Consello Regulador da Denominación de Orixe Ribeira Sacra. Grazas a todos eles.

Para finalizar, o noso máis especial agradecemento vai para Xesús Mato, Xosé Manuel Mato, Xesús Alonso Montero e Valentín García, por todo o que fixeron polo proxecto Manuel Rodríguez López.